Makati City — Tinatayang umabot sa Php853,076 halaga ng ilegal na droga ang nasabat sa isang lalaking suspek sa isinagawang procedural body search ng Makati City Police Station nito lamang Martes, Marso 21, 2023.
Kinilala ni PBGen Kirby John Kraft, District District ng SPD, ang suspek sa pangalang Alfred Labrador y Navarro, residente ng Quezon City.
Ayon kay PBGen Kraft, naaresto ng mga tauhan ng Comembo Makati CPS si Labrador sa kahabaan ng JP Rizal corner Mangga Street, Brgy. Comembo sa Makati City, pasado alas-10:00 ng umaga ng naturang petsa.
Batay pa sa ulat, binalewala ng suspek ang traffic light na nag-udyok sa mga tauhan ng Public Safety Department na siya ay pahintuin pero sa halip na makinig ay bumunot ito ng kanyang baril at tumakas patungo sa Mangga St. kaya agad itong nirespondehan ng mga tauhan ng SPD at Makati PS na humantong sa mabilis na pagkakadakip ng suspek.
Nakumpiska ng mga otoridad ang isang Armscor Caliber .45 pistol na may defaced serial number na kargado ng walong live ammunition; sling bag; isang motorsiklo; pouch; isang digital weighing scale; dalawang medium heat-sealed transparent plastic sachet na naglalaman ng pinatuyong high grade marijuana fruiting tops (Kush) na tumitimbang ng 25.9 gramo at may SDP na Php36,260; pitong heat-sealed transparent plastic sachet na naglalaman ng hinihinalang shabu na tumitimbang ng 120.12 gramo at nagkakahalaga ng Php816,816, at isang smart phone.
Paglabag sa RA 10951 (Comprehensive Firearms and Ammunition Regulation Act) at Paglabag sa Sec. 11 Art II ng RA 9165 (Comprehensive Dangerous Drugs Act of 2002) ang kahaharapin ng suspek.
Hindi kinukunsinte ng Southern Police District ang ganitong mga maling gawain kaya lalo pang paiigtingin ang kampanya kontra ilegal na droga at anumang uri ng kriminalidad sa lugar upang manatiling ligtas at mapayapa ang kanilang komunidad.
Source: SPD PIO
Panulat ni PSSg Remelin M Gargantos
