Timbog ang isang High Value Individual matapos mahulihan ng tinatayang Php7 milyong halaga ng hinihinalang shabu sa isinagawang buy-bust operation sa Sitio Omega, Barangay Sawang Calero, Cebu City nitong Abril 1, 2025.
Kinilala ni Police Captain Giann Karlo Reyes, Officer-In-Charge ng Police Station 6, Cebu City Police Office, ang suspek na si Norman, 37 taong gulang, residente ng Sitio Lawis, Barangay Mambaling, Cebu City at kasalukuyang nagtatrabaho bilang isang construction worker.
Dakong alas-12:25 ng hating gabi nang isagawa ang naturang buy-bust operation na humantong sa pagkadakip ng suspek.
Nakumpiska mula sa suspek ang 20 pakete ng hinihinalang shabu na aabot sa 1,050 gramo na may Standard Drug Price na Php7,140,000, isang blue travel bag at buy-bust money.
Nahaharap ang suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ang matagumpay na operasyong ito ay patunay ng patuloy na pagsusumikap ng mga kapulisan sa pagsugpo sa ilegal na droga upang mapanatili ang kaayusan at seguridad sa komunidad dahil sa Bagong Pilipinas, ang Gusto ng Pulis, Ligtas Ka!
