Nasabat mula sa apat na indibidwal ang tinatayang mahigit Php700,000 halaga ng ilegal na droga sa isinagawang buy-bust operation ng mga awtoridad sa Block 71, Lot 28, Talisay Street, Capili Subdivision, Barangay Baliok, Davao City nito lamang Nobyembre 2, 2024.
Kinilala ni Police Major Marcille M Manzano, Acting Station Commander ng Sasa Police Station, ang mga suspek na sina alyas “Badi”, 37 anyos na tinaguriang Top 3 Regional High Value Individual; alyas “John”, 24 anyos na tinaguriang Top 1 City High Drug Personality; alyas “Gino”, 29 anyos; at alyas “Nikola”, 37 anyos, pawang mga residente ng Davao City.
Narekober naman mula sa mga suspek ang humigit kumulang 97.53 na gramo ng hinihinalang shabu at humigit kumulang 6.71 na gramo ng hinihinalang cocaine.
Mahaharap naman ang mga suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Alinsunod sa kampanya ng Bagong Pilipinas, patuloy na nagsisikap ang mga tauhan ng Police Regional Office 11 sa pagpapatupad ng mas pinaigting na laban kontra ilegal na droga at kriminalidad.
Panulat ni Patrolwoman Shairra Rose A Aquino
