Tinatayang aabot sa mahigit Php680,000 halaga ng shabu ang nakumpiska sa isang ginang na umano’y tulak ng ilegal na droga sa isinagawang buy-bust operation sa Doña Pepang, Barangay Tejero, Cebu City nitong ika-29 ng Marso 2025.
Kinilala ni Police Major John Lynbert Castigador Yango, Station Commander ng Police Station 3, Cebu City Police Office, ang suspek na si alyas “Inday”, 50 taong gulang, residente ng nabanggit na lugar.
Ikinasa ang nasabing operasyon bandang 5:30 ng madaling araw na humantong sa pagkakaaresto sa suspek.
Nasamsam sa naturang suspek ang nasa 100.10 gramo ng hinihinalang shabu na may tinatayang halaga na Php680,680, sling bag, at buy-bust money.
Mahaharap ang suspek sa kasong paglabag sa Republic Act 9165 o ang “Comprehensive Dangerous Drugs Act of 2002”.
Ang Cebu City PNP ay walang tigil sa mga operasyon laban sa iligal na droga at lalo pang papaigtingin ang kampanya upang masakote ang mga indibidwal na nasa likod ng mga ilegal na gawain na ito.
