Nasamsam ang mahigit Php544,000 halaga ng shabu mula sa isang High Value Individual (HVI) sa isinagawang buy-bust operation ng mga operatiba ng Police Station 9–COCPO sa Barangay Macasandig, Cagayan de Oro City dakong alas-11:51 ng gabi ng Mayo 29, 2025.
Kinilala ni Police Brigadier General Jaysen C De Guzman, Regional Director ng Police Regional Office 10, ang suspek na si alyas “Henry”, 37 taong gulang, na kabilang sa Top 7 HVI sa ilalim ng “COPLAN SARSA” sa PNP/PDEA level.
Ayon sa talaan, dati na itong naaresto noong 2020 dahil sa kasong pagnanakaw at pansamantalang nakalaya sa pamamagitan ng piyansa.
Nasamsam mula sa suspek ang sampung (10) heat-sealed na plastic sachets na naglalaman ng puting kristal na substansyang pinaniniwalaang shabu na may kabuuang timbang na tinatayang 80 gramo at may Standard Drug Price na Php544,000 at iba pang drug paraphernalia.
Pinuri ni PBGen Jaysen C De Guzman, Regional Director ng PRO10, ang mga operatiba sa matagumpay na operasyon.
Hinimok din niya ang publiko na makipagtulungan sa mga awtoridad sa pamamagitan ng agarang pag-uulat ng mga kahina-hinalang aktibidad sa kanilang lugar.
