Cardona, Rizal – Tinatayang Php354,436 halaga ng shabu ang nakumpiska sa isang suspek sa buy-bust operation ng Rizal PNP nito lamang Huwebes, May 26, 2022.
Kinilala ni Police Captain Reynaldo Año, Acting Chief of Police ng Cardona Municipal Police Station, ang suspek na si John Bon Jovi Velasco San Jose, alyas Jovi, 33 at residente ng Concepcion St. Brgy. Dalig, Cardona, Rizal.
Ayon kay PCpt Año, bandang 8:40 ng gabi naaresto ang suspek sa nasabing barangay ng mga operatiba ng Cardona Municipal Police Station.
Ayon pa kay PCpt Año, nakuha mula sa suspek ang dalawang pirasong heat-sealed plastic sachets na naglalaman ng hinihinalang shabu na may timbang na 52.27 gramo at nagkakahalaga ng Php354,436; isang brown coin purse at isang pirasong Php500 bill na ginamit na buy-bust money.
Ang suspek ay nahaharap sa kasong paglabag sa RA 9165 o Comprehensive Dangerous Drugs Act of 2002.
Ang Rizal PNP sa pamumuno ni Police Colonel Dominic Baccay, Provincial Director, Rizal Police Provincial Office, ay patuloy sa kampanya laban sa ilegal na droga at iba pang krimen upang mapanatili ang maayos at ligtas na komunidad.
Source: Cardona Municipal Police Station
###
Panulat ni Police Executive Master Sergeant Elvis Arellano
