Taguig City – Umabot sa Php306,800 halaga ng shabu ang nakumpiska sa isang lalaki matapos magsagawa ng buy-bust operation ang Quezon City Police District nito lamang Martes, Hulyo 4, 2023.
Kinilala ni PBGen Nicolas Torre lll, District Director ng QCPD, ang suspek na si Usop, 40 taong gulang at residente ng Maharlika Village, Taguig City.
Ayon sa ulat, napag-alaman ng mga otoridad na naglalako ng droga ang suspek kaya isang pulis ang nagsilbing poseur buyer at bumili ng Php10,500 mula sa suspek na agaran namang inaresto ng mga operatiba ng District Drug Enforcement Unit (DDEU) bandang alas-11:30 ng gabi sa kahabaan ng Magiting St., Brgy. Teachers Village East, Quezon City.
Nakumpiska ng mga kapulisan ang 45 gramo ng shabu na nagkakahalaga ng Php306,800, isang puting coin purse, isang cellular phone, at buy-bust money.
Kasong paglabag sa R.A. 9165 o Comprehensive Dangerous Drugs Act of 2002 ang kahaharapin ng suspek.
“Binabati ko ang mga operatiba ng DDEU sa kanilang patuloy na operasyon laban sa ilegal na droga. Ito ay malaking kontribusyon upang mapanatiling ligtas at payapa ang Lungsod ng Quezon,” ani PBGen Torre III.
Source: PIO QCPD
Panulat ni PSSg Remelin M Gargantos
