Mahigit Php2.4 milyong halaga ng marijuana bricks ang narekober ng mga awtoridad na rumesponde sa isang sasakyang nasangkot sa aksidente sa Barangay Bado Dangwa, Tabuk City, Kalinga noong October 3, 2021.
Batay sa ulat, may mga nakakita umano na nagmula ang puting Toyota Fortuner na may plakang GAF08 mula sa direksyon ng Barangay Bantay at patungong Barangay Calanan. Nang nasa kurbahan na ang sasakyan ay inagaw umano nito ang kabilang linya kaya nabangga nito ang isang motorsiklo.
Isinugod sa pagamutan ang driver ng motorsiklo na kinilalang si Adrial Pangibitan na residente ng Barangay Bantay habang nakatakas naman ang hindi pa nakikilalang driver ng SUV.
Sa pagsisiyasat ng mga pulis sa loob ng SUV ay tumambad sa kanila ang 20 marijuana bricks na tinatayang may bigat na 20,400 na gramo at nagkakahalaga ng Php2,448,000.
Narekober din ang isang mobile phone, Certificate of Registration at Official Receipt; Advantage Card, at isang ATM Card.
####
Article by Police Corporal Melody L Pineda
