Isabela – Tuluyan nang iginawad kina Princess Dianne R. Valdez at Nanay Leonida Valdez ang mahigit isang milyong halaga ng complete package na Libreng Pabahay Project sa pamamagitan ng PNP Community Outreach Program mula sa 2nd Isabela PMFC sa pamumuno ni Police Lieutenant Colonel Dennis M Pamor, sa Brgy. Bliss Village, City of Ilagan, Isabela noong ika- 22 Ng Marso 2023.
Ang naturang pabahay ay mula sa napakahusay na inisyatibo ng 2nd IPMFC katuwang ang Masonic District RII-Isabela North, San Mariano Masonic Lodge No. 307 sa pangunguna ni Worshipful Master William A. Que Jr., at LGU-City of Ilagan na pinamumunuan ni Hon. Jose Marie L. Diaz, City Mayor.
Bukod sa libreng pabahay, nakatanggap rin ang mag-ina ng nag-uumapaw na biyaya gaya ng mga Furniture (Bed, Dining Table and Chairs, Wooden Sofa); Appliances (Refrigerator, Flat screen TV, Electric Fan, Gas Stove, Washing Machine, Rice Cooker, and Beddings); Pangkabuhayan Package (Sari-sari Store); Groceries; Cash Assistance at School Allowance Benefit kung saan ito’y may kabuuang halaga na Php1,265,000 kabilang na ang bahay at libreng lote.
Walang hangganang pasasalamat naman ang isinukli ng mapalad na benepisyaryo na si Princess maging ang kanyang nanay na hindi mapigilan ang luha dahil sa galak habang pinapakinggan ang mensahe ng pasasalamat ng kanyang anak.
Ayon kay Princess, walang pagsidlan ang kanyang tuwang nadarama sa sunud-sunod na biyayang ipinagkaloob sa kanilang mag-ina lalo na ang pagkakaroon ng magandang bahay na matagal ng pinapangarap ng kanyang ina at ibinahagi rin niya ang pagtulong sa kanila nina Police Senior Master Sergeant Gisela N Ydel Ng 2nd IPMFC at PCpl Maycel Joy Suyu ng IPPO-PCADU na nagsilbing daan upang sila’y magkaroon ng maayos na pamumuhay ngayon.
Samantala, malugod namang pinaunlakan ni Regional Director Police Brigadier General Percival A Rumbaoa bilang Guest of Honor and Speaker ang Ceremonial Blessing at Turn-over ng Pabahay kasama ang Isabela Police Provincial Office sa pangunguna ni Police Colonel Julio R Go at Police Lieutenant Colonel Lord Wilson Adorio, Chief of Police ng Ilagan CPS, mga LGU Officials ng City of Ilagan, Isabela sa pangunguna ni Hon. Jun Montereal, City Councilor; Hon. Evelyn L. Llamelo, Barangay Chairperson ng Brgy. Bliss Village; Rev. Fr. Jeizal Paul P. Cabasag, Parish Priest; mga miyembro ng Advocacy Support Group at Force Multipliers.
Sa mensahe ni RD Rumbaoa ay pinasalamatan niya at hinangaan ang pagtutulungan at pagkakaisa ng kapulisan at iba’t ibang stakeholders para maisakatuparan ang napakagandang libreng pabahay na handog sa mag-ina.
Naantig ang kanyang puso sa kwento ng buhay ng mag-ina at dagdag pa niya, ang kahirapan sa buhay na naranasan ng mag-ina ang magsisilbing tulay kay Princess upang mas lalo itong magsumikap na mapagtagumpayan ang anumang hamon sa buhay.
Ang Libreng Pabahay Project ay naging posible dahil sa tulong at suportang ibinigay ng mga sponsors gaya ng mga sumusunod: City of Ilagan – LGU; Liga ng Mga Barangay, City of Ilagan; Brgy. Bliss Village; San Mariano Masonic Lodge No. 307; United llocandia Fraternity and Sorority; Jayve Cares; Civic Action Group; Eagles Club; Hon. Gaylord Malunay, LNB; Hon. Evelyn Llamelo, Chairwoman Bliss Village; Hon. Roger Ramos, Chairman Brgy. Baligatan; Hon. Leonor Arellano; Isabela PPO, 1st IPMFC, Ilagan CPS; Cauayan CPS; WM William A. Que Jr; Mr. Billy Perez, President UI; Mr. Michael Rufino P. Corpuz, Gov. Eagles Club; Mr. & Mrs. Marcelino Mateo; 2nd IPMFC CAGPTD; Mrs. Glyde A. Ortiz, Sec. Bliss Village; Mr. Nestor Uy; Ms. Flor Gamayon; Mr. & Mrs. Kenneth Canalonga; PCMS Heherson Mallillin, PNP Ret; PSBRC CI 35 “NASIGLAT” at PSBRC CI 19 “MASIGASIG”.
Layunin ng programang ito na maisakatuparan ang pangarap ng maralitang pamilya na makaahon sa hirap at makapagbigay ng sapat na serbisyo ang kapulisan sa mamamayan nang may puso at tunay na malasakit.
Source: Isabela PIO, PPO
panulat ni PSSg Jerlyn V Animos
