Naga City – Umabot sa Php136,000 halaga ng umano’y shabu ang nakumpiska sa isang babae sa inilunsad na buy-bust operation ng pinagsamang mga operatiba ng Naga City PNP sa Zone 1, Brgy. Balatas, Naga City nito lamang Nobyembre 8, 2023.
Kinilala ni Police Major Crisanto Romero, Station Commander ng Police Station 6 – NCPO ang suspek na isang 43-anyos na babae, may kinakasama, walang trabaho at residente ng Brgy. Balatas, Naga City.
Ayon kay Police Major Romero, isinagawa ang operasyon bandang 5:30 ng hapon ng pinagsanib na pwersa ng mga operatiba ng Police Station 6- NCPO (lead unit), Police Station 2-NCPO, Naga City Intelligence Unit at Naga City Mobile Force Company sa pakikipag-ugnayan sa PDEA-Naga City Office.
Nakabili sa suspek ang poseur buyer ng isang plastic sachet ng shabu kapalit ang Php12,000 at sa isinagawang body search, narekober pa dito ang tatlong (3) piraso ng selyadong plastik na pakete ng hinihinalang shabu na may timbang na 20 na gramo na may street value na Php130,000.
Mahaharap ang suspek sa kasong paglabag sa RA 9165 o ang Comprehensive Dangerous Drugs Act of 2002.
Ang matagumpay na operasyon ay bunga ng walang tigil at mas pinaigting na kampanya ng Naga City PNP kontra ilegal na droga upang mapanatili ang kaayusan at gawing drug free ang lungsod mula sa ipinagbabawal na gamot.
Source: Naga City Police Office
