Nasamsam ng Philippine National Police (PNP) ang mahigit Php13 bilyong halaga ng ilegal na droga sa nakalipas na anim na buwan na ibinida ni Interior and Local Government Secretary Benjamin Abalos Jr. sa kanyang ulat sa press briefing na ginanap sa Kampo Crame noong Lunes, ika-24 ng Hunyo 2024.
Ayon kay SILG Abalos, ang PNP ay nagsagawa ng 23,515 bilang ng mga operasyon kung saan nasamsam ang nasabing mga ilegal na droga mula Enero hanggang Hunyo, taong kasalukuyan.
“Sa kalahating taon na ito sa droga, gusto nating i-report na ang nagawang operasyon ng Philippine National Police ay 23,515 na nagresulta sa pag-aresto ng 28,804 na individuals, at sa pagkumpiska ng Php13,677,000,000,” ani SILG.
Tinatayang Php52 milyong halaga ng narcotics, kabilang ang crystal meth (shabu), dried marijuana, at marijuana plants ang nasabat mula Hunyo 17 hanggang Hunyo 21. Ang 111 operasyon sa loob ng parehong linggo ay nagresulta sa pagkakaaresto ng 123 indibidwal, dagdag niya.
Sa kabilang banda, binigyang-diin naman ni PGen Rommel Francisco D Marbil, Hepe ng PNP, ang pangangailangang doblehin ang pagsisikap ng puwersa ng pulisya na labanan ang ilegal na droga para makatulong sa pagkamit sa layunin ng gobyerno para sa Pilipinas na “100 percent drug-free”.
Panulat ni Tintin
