Arestado ang isang menor de edad at limang indibidwal sa magkahiwalay na buy-bust operation ng Quezon City Police District na nagresulta sa pagkasamsam ng may tinatayang Php128,120 halaga ng ilegal na droga noong Mayo 12-13, 2022.
Kinilala ni PBGen Remus Medina, Quezon City Police District (QCPD) Director, mula sa ulat ng Talipapa Police Station (PS 3) na pinamumunuan ni PLtCol Alexander Barredo ang mga suspek na sina Vangie Frogoza, 39; Julie Ann Lacudine, 32; at Rodolfo Padon, 30, na kapwa nakatira sa Brgy. Baesa, Quezon City; at si Ariel Ocampo, 47, na residente ng Tandang Sora, Quezon City.
Ayon kay PLtCol Barredo, nakumpiska mula sa apat na suspek ang 10 gramo ng hinihinalang shabu na nagkakahalaga ng Php68,000, isang telepono, at ang perang ginamit sa transaksyon sa No.169 Sitio Pajo, Brgy. Baesa, Quezon City.
Samantala, sa ikinasang buy-bust operation naman ng Galas Police Station (PS 11) sa pamumuno ni PLtCol Richard Ian Ang, naaresto ang mga suspek na sina Lenard Ilustre, 20; at isang menor de edad na parehong nakatira sa Brgy. San Jose, Quezon City, sa kahabaan ng Victory Ave., malapit sa Quezon Ave., Brgy. Tatalon, Quezon City.
Nakumpiska mula sa dalawamg suspek ang 501 gramo ng marijuana na nagkakahalaga ng Php60,120, isang cellphone, isang brown bag, at ang perang ginamit bilang buy-bust money.
###
