General Santos City – Tinatayang nasa mahigit Php100K halaga ng shabu ang nasabat ng mga operatiba ng General Santos City Police Office (GSCPO) sa isang fish port laborer na nasakote sa ikinasang buy-bust operation sa Purok Maunlad, Brgy. Tambler, General Santos City nito lamang Miyerkules, Agosto 9, 2023.
Kinilala ni Police Colonel Jomar Alexis A Yap, City Director ng GSCPO, ang naaresto na si alyas “Boboy”, 43, may kinakasama, at residente ng Barangay Fatima ng naturang lungsod.
Ikinasa ang buy-bust operation laban kay alyas “Boboy” matapos ipaalam ng isang Brgy. Kagawad ang ginagawang pagbebenta nito ng shabu sa fish port area sa Brgy. Tambler, General Santos City na kung saan agad namang kumagat sa pain ang suspek.
Ayon kay PCol Yap, nakumpiska mula sa suspek ang tinatayang nasa mahigit 15 gramo ng hinihinalang shabu na may tinatayang halaga na Php103,020, marked money at iba pang non-drug item.
Nahaharap ang suspek sa paglabag sa RA 9165 o Comprehensive Dangerous Drugs Act of 2002.
Kaugnay ng matagumpay na operasyon ay tiniyak ni PCol Yap na kanilang ipagpapatuloy ang pinaigting at pinahusay na kampanya kontra ilegal na droga maging sa lahat ng uri ng kriminalidad para sa kaayusan, kaligtasan, at kapayapaan ng lungsod.
Panulat ni Patrolman Khnerwin Jay A Medelin
