Arestado ng mga tauhan ng Manila Police District ang dalawang indibidwal sa magkahiwalay na buy-bust operation na nagresulta sa pagkakasamsam ng mahigit 1.4 milyong halaga ng ilegal na droga nito lamang Huwebes, Agosto 15, 2024.
Ayon kay Police Major General Jose Melencio C Nartatez Jr, Regional Director ng National Capital Regional Police Office, isinagawa ang unang operasyon dakong 5:30 ng hapon ng mga tauhan ng Sta. Ana Police Station (PS6) –Station Drug Enforcement Unit (SDEU), ang suspek na si alyas “Ram,” 47 anyos sa loob ng kanyang tirahan sa 1858 Oro B. Street, Barangay 770, Zone 84, Sta. Ana, Maynila.
Nakuha mula sa suspek, ang 200.3 gramo ng hinihinalang shabu na may tinatayang street value na Php1,362,040, marked money na Php500 bill na ginamit sa buy-bust operation.
Kinagabihan, isa namang matagumpay na anti-drug operation ang isinagawa ng mga operatiba ng SDEU ng Ermita Police Station sa kahabaan ng Lanuza Street malapit sa kanto ng P. Quirino Avenue, Barangay 685, Paco, Manila na nagresulta sa pagkakaaresto kay alyas “Idol,” isang 39 anyos na miyembro ng Bahala na gang.
Nahuli ang suspek na nagbebenta ng shabu sa isang undercover na pulis gamit ang marked money at narekober ng mga awtoridad ang 20 gramo ng shabu na may street value na Php136,000.
“Kami ay patuloy na mag-strike sa gitna ng mga operasyon ng ilegal na droga, at pagbuwag sa mga network. Gayunpaman, kailangan natin ang tulong ng ating kapwa. Hinihikayat namin ang publiko na manatiling mapagmatyag at iulat ang anumang kahina-hinalang aktibidad sa pinakamalapit na istasyon ng pulisya, dahil mahalaga ang pagtutulungan ng komunidad sa patuloy na paglaban sa ilegal na droga”, pahayag ni PMGen Nartatez.
Source: SPD PIO
