Nasabat ang mahigit sa Php1.3 milyong halaga ng shabu sa dalawang naarestong indibidwal sa isinagawang buy-bust operation ng Bacolod City PNP sa Alijis Taculing Road, Brgy. Alijis, Bacolod City bandang 3:15 ng madaling araw noong ika-8 ng Nobyembre 2022.
Kinilala ni Police Lieutenant Joven Mogato, Hepe ng City Drug Enforcement Group-BCPO, ang mga suspek na sina alyas Abby, 28, babae, residente ng ECC Villas Subd., Brgy. Alijis, Bacolod City at si alyas Freely, 39, may asawa, at residente ng Prk. Cabugwason, Brgy. Mansilingan, Bacolod City.
Ayon kay PLt Mogato, naaresto ang mga suspek matapos magbenta sa isang police poseur buyer ng isang piraso ng heat-sealed transparent plastic sachet na naglalaman ng white crystalline substance ng hinihinalang shabu kapalit ng Php5,000 na ginamit bilang buy-bust money.
Dagdag pa, narekober mula sa kanila ang isang Unit ng White Toyota Vios na may plate no. 060407, isang sling bag, 13 pakete at dalawang piraso ng knot tied plastic bag na parehong naglalaman ng hinihinalang shabu na tinatayang may timbang na 201 gramo at nagkakahalaga ng Php1,366,800, isang Oppo Cellphone, at Php700.00 sa iba’t ibang denominasyon.
Ang ating kapulisan ay patuloy sa mas pinaigting na kampanya laban sa ilegal na droga at iba pang uri ng kriminalidad upang mapanatili ang kaayusan at kapayapaan sa ating bansa.
