Davao City – Tinatayang Php1,250,000 halaga ng hinihinalang smuggled na sigarilyo ang nasabat sa checkpoint ng pinagsamang tauhan ng Toril Police Station at Task Force Davao sa Brgy. Sirawan, Toril, Davao City, noong Hulyo 17, 2022.
Kinilala ni PMaj Carol Jabagat, Station Commander ng nasabing istasyon, ang mga suspek na si Robert Borlasa Penetrante, 26, at Romel Bolivar Penetrante, 43, na pawang mga residente ng Udang Compound, Catalunan Grande, Davao City.
Ayon kay PMaj Jabagat, naaresto ang mga suspek matapos maharang at walang maipakitang kaukulang dokumento para sa kanilang kargamento sa isang checkpoint na isinasagawa ng tauhan ng Toril PS at TF Davao.
Ayon pa kay PMaj Jabagat, nakuha mula sa mga suspek ang 85 reams ng isang brand ng sigarilyo na may halagang humigit kumulang Php1,250,000 at ang isang sasakyan na lulan ang hinihinalang smuggled na sigarilyo na may plate number na KAL 7571.
Ang mga suspek ay nahaharap sa kasong paglabag sa Republic Act 4712 (An Act Amending Certain Sections of the Tariff and Customs Code of the Philippines).
Nagpaalala naman ang PNP na huwag magtangka na magpuslit ng anumang kontrabado o ilegal na kargamento at sumunod sa tamang proseso ng pagtrasport nito nang walang maging problema o paglabag sa batas.
###
Panulat ni Patrolman Alfred Vergara
