Nagsimula nang magtalaga ng mahigit 2,400 pulis ang Pangasinan Police Provincial Office (PPO) sa iba’t ibang polling center bilang bahagi ng paghahanda para sa midterm elections sa Mayo 12.
Ayon kay Police Colonel Rollyfer Capoquian, Provincial Director ng Pangasinan Police Provincial Office, nagsimula ang deployment nitong ika-6 ng Mayo, 2025 kasabay ng pagdadala ng mga Automated Counting Machine (ACM) ng Commission on Elections (COMELEC) sa mga paaralan na gagamiting botohan. Ang mga pulis ay nagsilbing escorts ng mga sasakyang dala ng COMELEC.
Sa kabuuan, 2,408 sa 3,509 pulis ng lalawigan ang itinalaga sa mga polling center, sa layuning mapanatili ang kaligtasan at kaayusan ng halalan. Bawat lugar ng botohan ay binigyan ng dalawang pulis bilang bahagi ng seguridad.
Dagdag pa ni PCol Capoquian, katuwang din ng Pangasinan PPO sa pagbabantay ang iba’t ibang national government agencies gaya ng Armed Forces of the Philippines at Philippine Coast Guard, lalo na sa mga liblib at isla.
Bukod sa deployment, nagtayo rin ang kapulisan ng mga checkpoint at nagtalaga ng Quick Reaction Teams sa walong lugar na itinuturing na “areas of concern” dahil sa mga nakaraang insidente ng karahasan tuwing halalan.
Kabilang sa mga bayan at lungsod na nasa ilalim ng “yellow category” dahil sa matinding iringan sa pulitika at kasaysayan ng election-related incidents ay ang Aguilar, Binmaley, Malasiqui, Mangaldan, San Quintin, Sual, Urdaneta, at Dagupan City.
Tinatayang aabot sa 2.1 milyong rehistradong botante sa Pangasinan ang inaasahang boboto sa halos 2,869 clustered precincts sa darating na halalan.
Panulat ni PMSg Marvin Jake Romero
Source: https://www.pna.gov.ph/articles/1249477
