Cebu – Arestado ng mga tauhan ng Cebu PNP ang isang magsasaka na naaktuhang nagtatanim ng marijuana sa Sitio Abayan, Brgy. General Climaco, Toledo City, Cebu nito lamang Biyernes, Abril 28, 2023.
Kinilala ni Police Lieutenant Colonel Epream Paguyod, Force Commander ng 2nd Provincial Mobile Force Company, ang naarestong suspek na si ‘Demetrio’, 57, at residente ng nabanggit lugar.
Ayon kay PLtCol Paguyod, habang ipinapatupad ng mga tauhan ng 2nd PMFC kasama ang Provincial Intelligence Unit ng CPPO at RMFB7 ang Warrant of Arrest laban kay alyas “junjun”, naaresto ng grupo ang naturang suspek na nahuli sa akto na nagtatanim ng mga halamang marijuana.
Nakuha mula rito ang nasa 500 gramo ng pinatuyong dahon ng marijuana na may DDB value na Php10,000 at isang unit .45 caliber pistol, 3 bala at isang magazine.
Matagumpay naman na sinira at sinunog ng kapulisan ang nasa 500 stalks ng fully grown marijuana na may tinatayang halaga na Php200,000.
Ang suspek ay nahaharap sa kasong paglabag sa Section 11 at 16 ng RA 9165 o Comprehensive Dangerous Drugs Act of 2002 at RA 10591 o ang “Comprehensive Firearms and Ammunition Regulation Act”.
Patuloy ang buong hanay ng Cebu Police Provincial Office sa pagpapaigting sa kampanya kontra ilegal na droga maging sa lahat ng uri ng kriminalidad para kaayusan, kaligtasan at kapayapaan ng komunidad.
