Kidapawan City – Kalaboso ang isang magnanakaw dahil sa mahigpit na pagbabantay seguridad ng Kidapawan City Police Station sa pagdiriwang ng Semana Santa sa Kidapawan City, noong Abril 14, 2022.
Kinilala ni PLtCol Peter Pinalgan Jr, Acting Chief of Police ng Kidapawan City Police Station ang suspek na si Jun Jun Bayaan Batooy, residente ng Brgy. Poblacion, Kidapawan City, North Cotabato at dati ng naaresto dahil sa ilegal na droga.
Ayon kay PLtCol Pinalgan Jr, dahil sa agarang pag-aksyon ng kanyang mga tauhan ay naaresto ang suspek bandang alas 3 ng hapon sa Perez Street Kidapawan City dahil sa tangka nitong pagnanakaw ng pera sa isang Suzuki multicab na nakaparada sa lugar.
Nakita umano ng suspek ang iniwang pera ng may-ari na nagkakahalaga ng Php1,350 sa dashboard ng sasakyan at walang alinlangan na kinuha ito.
Pinasalamatan naman ni PLtCol Pinalgan Jr ang mga tao sa masigasig na pag-uulat ng mga insidente sa kapulisan na humantong sa matagumpay na pagkakadakip sa magnanakaw.
“Pinapaalalahanan namin ang mga mamamayan ng ating lungsod na maging mas mapagmatyag at personal security conscious lalo na tuwing Semana Santa dahil laganap ang masasamang loob at huwag mag-atubiling i-report sa PNP ang anumang kahina-hinalang aktibidad sa ating lugar,” pahayag ni PLtCol Pinalgan Jr.
###
Panulat ni Patrolwoman Sherie-ann Masi
