Timbog ng mga awtoridad ang isang lalaki matapos maaktuhang nagnakaw ng mga bungkos ng copper wires sa Carbonsite Barangay Lamao, Limay, Bataan nito lamang Linggo, ika-23 ng Hunyo 2024.
Kinilala ni Police Major Dennis B Duran, Chief of Police ng Limay Municipal Police Station, ang suspek na si Alyas “Caloy”, 25 anyos, residente ng nasabing lugar.
Ayon sa ulat ng Limay MPS, agad silang rumesponde matapos makatanggap ng sumbong mula sa caretaker ng Aldava Engineering at dito naaktuhan ang suspek at nakuha ang aabot sa 240 na metro ng copper wires na may tinatayang halaga na Php360,000.
Nakatakas naman ang kasama nito at kasalukuyang tinutugis ng mga awtoridad.
Sa patuloy na pagkapkap sa suspek, nakuhanan ito ng dalawang piraso ng maliliit na plastic sachets ng hinihinalang shabu na may bigat na 0.12 gramo at nagkakahalaga ng Php816.00.
Nahaharap ang suspek sa kasong Theft at kasong paglabag sa Republic Act 9165 o Comprehensive Dangerous Drugs Act of 2002.
Ang Bataan PNP ay walang tigil sa pagsasawata sa mga lumalabag sa batas at pagpapaigting ng kampanya laban sa mga gumagamit at nagbebenta ng ilegal na droga upang mapanatiling ligtas ang komunidad sa anumang uri ng krimen.
