Cebu City – Kalaboso ang magkasintahan matapos makumpiskahan ng nasa Php680,000 halaga ng shabu sa buy-bust operation na inilunsad ng Regional Police Drug Enforcement Unit 7 sa Villa San Pedro, Brgy., Basak Pardo, Cebu City noong Sabado ika-29 ng Abril 2023.
Kinilala ng Chief RPDEU 7, Police Lieutenant Colonel Jomar Dela Cerna, ang mga nadakip na si ‘Marlon’, 43, at ‘Jennybeth’, 39, kapwa residente ng nasabing barangay.
Dakong alas-2 ng madaling araw nang ikasa ng mga awtoridad ang operasyon laban sa mga suspek na humantong naman sa kanilang agarang pagkakaaresto matapos makabili ang nagpanggap na poseur buyer ng droga sa mga ito.
Nasamsam mula sa mga suspek ang hinihinalang shabu na tumitimbang ng nasa 100 gramo at nagkakahalaga ng Php680,000.
Kasong paglabag sa RA 9165 (Comprehensive Dangerous Drugs Act of 2002) ang kakaharapin ng mga suspek.
Patuloy naman ang buong hanay ng kapulisan ng Rehiyon 7 sa kanilang pagpapaigting at pagpapahusay ng kanilang mga hakbangin para sa katagumpayan ng kampanya kontra ilegal na droga at maging sa lahat ng uri ng kriminalidad.
