San Pablo City, Laguna – Arestado ang magkapatid na suspek sa pagpatay sa isang biktima sa ginawang follow-up operation ng San Pablo PNP nito lamang Linggo, May 29, 2022.
Kinilala ni Police Colonel Cecilio Ison Jr., Provincial Director ng Laguna Police Provincial Office, ang dalawang suspek na sina Maximo Vallano Oribiada, 34, residente ng Brgy. San Gregorio, San Pablo City Laguna at Ryan Vallano Oribiada, 25 at residente ng Brgy. Sinipian, Nagcarlan, Laguna.
Samantalang ang biktima ay si Diolando Minis Banayad, nasa wastong gulang at residente ng Brgy. San Gregorio, San Pablo City Laguna.
Ayon pa kay PCol Ison, bandang 4:00 ng hapon ng mangyari ang insidente nang pinagtulungang paluin ng mga suspek gamit ang kahoy at bote ng beer ang biktima na nagtamo ng head injury at naging dahilan ng kanyang pagkamatay.
Ang dalawang suspek ay nahaharap sa kasong Murder.
“Pinupuri ko ang San Pablo CPS sa agaran nitong aksyon para madakip ang magkapatid na sangkot sa panghahampas na ikinasawi ng biktima”, ani PBGen Yarra, Regional Director ng CALABARZON.
Source: Laguna Police Provincial Office
###
Panulat ni Police Executive Master Sergeant Elvis Arellano
