Arestado ng Capalonga PNP ang magkapatid na kapwa akusado sa panggagahasa sa kani-kanilang mga anak sa isinagawang operasyon nitong Huwebes, Mayo 5, 2022.
Kinilala ni Police Captain Teddy Flaga, Chief of Police ng Capalonga Municipal Police Station ang mga suspek na sina Dante Gara y Rodriguez, alyas “Enteng”, 57, may asawa at si Danilo Gara y Rodriguez, alyas “Danny”, 54, may kinakasama, parehong residente ng Barangay Old Camp, Capalonga, Camarines Norte.
Ayon kay PCpt Flaga, nadakip ang mga suspek bandang 11:30 ng umaga, sa Barangay Lawang Cupang, San Antonio, Nueva Ecija sa bisa ng mga Warrant of Arrest sa pinagsanib na operasyon ng Capalonga MPS, Provincial Highway Patrol Team 3, San Antonio MPS, Nueva Ecija at CIDT- Camarines.
Dagdag pa ni PCpt Flaga, si alyas Enteng ay akusado sa panghahalay na may kaakibat na pananakot sa kanyang dalawang anak na babae na pawang nasa edad anim na taong gulang nang naganap ang krimen taong 2001 at 2004. Ang akusado ay ikawalo sa Regional Most Wanted Person sa Bicol Region.
Samantala, ang suspek na si alyas Danny ay akusado rin sa panghahalay, pang-aabuso at pananakot na papatayin ang 14 anyos nitong anak na makailang ulit na naganap noong taong 2006 at ang huli ay noong taong 2011. Si alyas Danny ay ikalawa naman sa listahan ng Municipal Most Wanted Person ng Capalonga.
“Hindi katanggap-tanggap sa lipunan ang mga kawalang-hiyaang ginagawa ng dalawang magkapatid na akusado sa kanilang sariling dugo at laman. Nararapat lamang na sila’y pagbayarin sa kanilang mga kasalanan upang mabigyan ng karampatang hustisya ang kanilang mga biktima. Ang ating mga kapulisan ay magpapatuloy sa pagganap ng aming mga tungkuling maipagtanggol at bigyan ng hustisya ang sinumang mga naaapi” mensahe ni Police Colonel Julius Guadamor, Provincial Director, Camarines Norte Police Provincial Office.
Source: Cam Norte PPO
###
Panulat ni PCpl Cristopher D Ignacio
