Arestado ang magkaibigan na kapwa High Value Individual sa isinagawang drug buy-bust operation ng Iloilo City Drug Enforcement Unit (CDEU) 6 at nasabat ang Php748,000 halaga ng droga sa Zone 2 Barangay San Juan, Molo, Iloilo City nito lang ika-26 ng Hulyo 2024.
Kinilala ang mga suspek na si alyas “Tayson”, 23 anyos, habang nahuli rin ang kanyang kasama na si alyas “Joseph”, 19 anyos na itinuturing na high value drug personality ng pulisya at residente ng nasabing lugar.
Ayon kay Police Lieutenant Nick Gallego, team leader ng CDEU, nakatanggap sila ng impormasyon na muling bumalik sa pagtutulak ng ilegal na droga si alyas Tayson na nakulong na noong 2023 kaya siya minonitor.
Samantala, si alyas Joseph naman ang kasama ni alyas Tayson sa pagtransaksyon sa mga parokyano.
Nakumpiska mula sa mga suspek ang 25 plastic sachet ng pinaghihinalaang shabu na may bigat na humigit kumulang 110 gramo at may Standard Drug Price na Php748,000.
Bukod sa ilegal na droga, narekober din sa bahay ng suspek ang isang caliber .22 revolver na baril.
Kasalukuyang nakakulong ang magkaibigan sa Molo Municipal Police Station para sa tamang disposisyon ng kaso at sasampahan ng kasong paglabag sa Republic Act 9165 o Comprehensive Dangerous Drugs Act of 2002 at RA 10591 o Illegal Possession of Firearms and Ammunition.
Patuloy ang kampanya ng Iloilo City PNP na mapanagot ang nagbebenta at gumagamit ng ilegal na droga sa kanilang nasasakupan.
Source: Aksyon Radyo Iloilo
Panulat ni Pat Ryza Valencia
