Tawi-Tawi – Timbog ang limang kalalakihan matapos mahulihan ng shabu ng pulisya sa Brgy. Tubig Boh, Bongao, Tawi-Tawi noong Mayo 6, 2023.
Kinilala ni Police Lieutenant Colonel Christian Joy Alqueza, Force Commander ng Tawi-Tawi Provincial Mobile Force Company, ang mga suspek na sina alyas “Wah”, 29; alyas “Abraham”, 23; alyas “Kimhar”, 34, at alyas “Nas”, 26, na pare-parehong residente ng nasabing lugar, at si alyas “Lalaw”, 16, na residente ng Brgy. Tubig Mampallam, Bongao, Tawi-Tawi.
Ayon kay PLtCol Alqueza, habang nagsasagawa ng foot patrol ang mga tauhan ng Tawi-Tawi PMFB katuwang ang Bongao MPS, at 5th Regional Mobile Force Company, RMFB BASULTA, ay may tumawag na concerned citizen tungkol sa nangyayaring bentahan ng shabu sa lugar.
Agad itong pinuntahan ng mga operatiba upang beripikahin ang nasabing report at nahuli sa akto ang mga suspek na nagbebenta ng ilegal na droga.
Nakumpiska mula sa mga suspek ang isang heat-sealed transparent plastic sachet na naglalaman ng white crystalline substance na may bigat na 4.4 gramo at tinatayang nagkakahalaga ng Php29,000 at 72 pirasong straw heat-sealed transparent plastic sachet, na may bigat na 2.160 gramo at tinatayang nagkakahalaga ng Php14,668.
Nakumpiska rin mula sa mga suspek ang apat na wallet, dalawang coin purse, drug money na ginamit, at isang plastic case na naglalaman ng aluminum foil.
Mahaharap ang mga suspek sa kasong paglabag sa RA 9165 o “Comprehensive Dangerous Drugs Act of 2002” kapag napatunayang nagkasala ang mga ito.
Ito ay isa sa patunay na ang mga tauhan ng PRO BAR ay hindi nagpapabaya sa kanilang sinumpaang tungkulin at hulihin ang mga taong sangkot sa ilegal na gawain para makamit ang kaayusan para sa mas maunlad at mapayapang pamayanan.
Panulat ni Pat Mark Vincent Valencia
