Arestado ang limang (5) Chinese Nationals sa kasong Kidnapping, paglabag sa Republic Act 10591 at RA 9165 ng mga operatiba ng Pasay City Police Station sa MOA Complex, Pasay City bandang 4:00 ng umaga ng Marso 12, 2025.
Kinilala ni Police Colonel Joselito M. De Sesto, Chief of Police ng Pasay CPS, ang mga suspek na sina alyas “Jian”, “Julius”, “Xin”, “Bang” at si “Niu”, na pawang mga Chinese Nationals habang ang kidnap victim ay kinilalang si alyas “Fei” na na-rescue sa operasyon.
Nakumpiska mula sa mga suspek ang 154.4 gramo ng hinihinalang shabu na may Standard Drug Price na Php761,000 at dalawang (2) .38 caliber revolver na may bala.
Nahaharap ang mga suspek sa mga kasong Kidnapping for Ransom, paglabag sa Republic Act 9165 o ang “Comprehensive Dangerous Drugs Act of 2002”, RA 10591 o ang “Comprehensive Firearms and Ammunition Regulation Act” na may kaugnayan sa RA 7166 o ang “Omnibus Election Code”, at Reckless Imprudence resulting in Homicide.
Pinuri naman ni Police Brigadier General Manuel J. Abrugena, District Director ng Southern Police District, ang tagumpay ng operasyon, anya, “Ang kasong ito ay nagpapakita ng kakayahan ng ating kapulisan na kumilos ng mabilis laban sa mga kriminal at protektahan ang ating mga komunidad. Patuloy tayong magsasagawa ng mga intelligence-driven operations upang matiyak ang kaligtasan ng publiko.”
Photo by SPD FB Page
