Sa pagsisimula ng Semana Santa at habang nagpapatuloy ang banal na buwan ng Ramadan, nanawagan si Philippine National Police (PNP) Chief Gen. Rodolfo Azurin Jr. noong Linggo sa lahat ng commanders ng puwersa na sikapin ang zero-casualty observance.
“Siguraduhin nating lahat na walang mangyayaring hindi kanais-nais na insidente sa mga paliparan at daungan lalo na sa mga bagahe o gamit ng mga pasahero. Sa mga sumasakay sa bus, pakitiyak na ang mga driver ay maayos, hindi pagod at ang mga bus ay nasa maayos na kondisyon. Panatilihin natin itong Holy Week na isa sa pinakaligtas at pinakapayapa,” saad ni PGen Azurin.
Inilunsad ng PNP ang taunang kampanyang “Ligtas SumVac (Summer Vacation) 2023” na mag dedeploy ng 74,114 na pulis upang matiyak ang kaligtasan at seguridad ng publiko sa Semana Santa.
Upang tulungan ang publiko at agarang matugunan ang mga partikular na reklamo, ang mga Assistance Hub at Police Assistance Desk na may kabuuang 38,387 ay ipapakalat sa pamamagitan ng mobile at foot/beat patrol.
Ang karagdagang 39,504 officers ay ipapakalat para sa mga partikular na lugar ng convergence tulad ng mga pangunahing lansangan, mga hub ng transportasyon, mga terminal, mga lugar na komersyal, at mga lugar ng pagsamba.
Hinikayat din ng PNP Chief ang publiko na makipagtulungan sa mga awtoridad at sumunod sa safety protocols.
“Ang deployment ng ating mga pulis ay naglalayong magbigay ng maximum security coverage sa publiko na makikibahagi sa iba’t ibang relihiyosong aktibidad,” ani ng Hepe.
Samantala, ipinag-utos ni PBGen Joel Doria, Direktor ng Police Regional Office-Mimaropa, ang lahat ng Chief of Police at unit commanders na paigtingin ang visibility sa mga tourist spot at iba pang lugar ng convergence sa Mindoro, Marinduque, Romblon at Palawan sa inaasahang pagdagsa ng mga turista at pagbabalik ng mga residente.
Sa darating na semana santa, buong pwersa ang ating mga kapulisan upang masiguro ang mapayapa at ligtas na paggunita.
