Isabela – Arestado ng pulisya ang lalaking walang habas na nagpaputok ng baril sa Brgy. San Luis, Cauayan City, Isabela noong ika-1 ng Enero 2023.
Kinilala ang armadong suspek na si Danilo Gandeza, 41, residente ng nasabing barangay matapos ireklamo ng walang habas na pagpapaputok ng baril gamit ang isang kalibre 45 Armscor na ikinaalarma at nagdulot ng tensyon at takot sa mga residente sa nasabing barangay.
Ayon sa imbestigasyon, dakong 4:00 ng hapon, ang lasing at armadong suspek ay inireklamo sa ginawang pagpapaputok ng kanyang baril na agad namang inaresto ni Patrolman Jomar Vergara.
Ang naturang suspek kasama ng nakumpiskang baril ay agad dinampot ng Cauayan City PNP at sinampahan na ng kasong paglabag sa RA 11926 (An Act Penalizing Willful and Indiscriminate Discharge of Firearms, amending for the purpose Act No. 3815, as amended, otherwise known as the Revised Penal Code) at RA 10591 o Comprehensive Firearms and Ammunition Regulation Act.
Minsan na namang napatunayan ng kapulisan ang mahigpit na pagpapanatili ng kapayapaan at kaayusan sa komunidad kaya’t sinumang lalabag ay tiyak na matitimbog agad.
Source: PRO2 Regional Public Information Office
Panulat ni PSSg Jerlyn V Animos
