Arestado ang isang 36 anyos na lalaki matapos tumakas sa checkpoint at makuhanan ng hindi lisensyadong baril ng mga awtoridad nito lamang Lunes, Enero 22, 2024.
Kinilala ni Police Major Arvin John Camping, Hepe ng Pikit Municipal Police Station, ang naarestong suspek na si alyas “Mando”, may asawa, at residente ng Barangay Lower Mingading, Aleosan, Cotabato.
Bandang 11:00 ng umaga nang nagsagawa ng Checkpoint Operation ang kanilang hanay sa Brgy. Takepan, Pikit, Cotabato at nang kanilang parahin ang minamanehong motorsiklo ni alyas “Mando” sa kadahilanang walang nakakabit na plaka ay bigla itong hinarurot ang motorsiklo palayo sa checkpoint.
Matagumpay namang nadakip ng mga awtoridad ang papatakas na suspek, at nang isinailalim ito sa body search ay narekober sa kanya ang isang caliber 45. Pistol na may kasamang magazine at anim na bala.
Nahaharap sa kasong paglabag sa RA 10591 o Comprehensive Firearms and Ammunition Regulation Act.
Mahigpit na babantayan ng PNP ang mga lansangan sa pamamagitan ng patuloy na pagsasagawa ng checkpoint upang masawata ang mga lumalabag sa batas partikular na sa talamak na bentahan ng mga ilegal na droga sa komunidad.
