Timbog sa isinagawang hot pursuit operation ng mga operatiba ng Pagadian City Police Station ang isang lalaking suspek sa pananaksak sa Purok 1 Barangay Deborak, Pagadian City noong Enero 2, 2025.
Kinilala ni Police Lieutenant Colonel Jerwin S Cagurin, Acting Chief of Police ng Pagadian City Police Station, ang naaresto na si alyas “Leon”, 42 anyos, lalaki, walang trabaho, residente ng Purok 2 Barangay Dampalan, Pagadian City.
Ayon sa paunang imbestigasyon, base sa salaysay ng kasintahan ng biktima na si alyas “Jen”, nag-iinuman ang biktima (alyas Mar) at suspek sa nasabing lugar nang magkaroon ng mainit na pagtatalo.
Sa kasagsagan ng kanilang alitan, sinaksak ng suspek ang biktima na tinamaan sa hita at kilikili.
Ang agarang tugon ng Pagadian City PNP sa tulong at kooperasyon ng mamamayan ay nagresulta sa mabilisang pagdakip sa suspek at pananatili ng kaayusan at katahimikan sa ating pamayanan.
Panulat ni Pat Joyce Franco
