Solano, Nueva Vizcaya – Arestado ng Solano PNP ang isang lalaki matapos nanutok at nagpaputok ng baril sa Barangay Quirino, Solano, Nueva Vizcaya, gabi ng Hulyo 4, 2022.
Kinilala ni Police Colonel Ranser A Evasco, Provincial Director ng Nueva Vizcaya Police Provincial Office, ang suspek na si Joseph Paladin Benicta, 56, residente ng Magsaysay St., Brgy. Quirino, Solano, Nueva Vizcaya.
Ayon sa report, bandang 10:20 ng gabi ng magtungo sa Solano Police Station ang isang concerned citizen para ireport ang nasabing panunutok at pagpapaputok ng suspek sa nasabing barangay.
Agad na pinuntahan ng mga kapulisan ang lugar at inabutan pa ang suspek na may hawak na baril. Nagtangkang ihagis ni Benicta ang hawak na baril subalit agad siyang dinis – armahan ng mga otoridad.
Nakumpiska mula sa suspek ang isang unit ng Smith and Wesson Caliber 22 revolver na may serial number 998072 at pitong bala.
Narekober din ang dalawang basyo ng bala sa pinangyarihan ng insidente.
Bigong ipakita ng suspek ang kaukulang dokumento na patunay ng pagmamay-ari ng baril.
Samantala, kasalukuyan ding hinihintay ang kumpirmasyon ng rehistro nito sa Firearms Explosives Office (FEO).
Nahaharap ang suspek sa kasong paglabag sa Republic Act 10591 or Comprehensive Firearms and Ammunition Regulation Act, Illegal Discharge of Firearms at Alarm and Scandal.
Patuloy ang panghihikayat ng PNP sa mga mamamayan na patuloy na makipagtulungan sa mga otoridad upang mahuli at mapanagot sa batas ang mga lumalabag nito.
Source: Nueva Vizcaya PPO
###
Panulat ni Police Corporal Carla Mae P Canapi
