Quezon City — Arestado ang lalaking nagreklamo sa pulisya matapos mapag-alaman ng otoridad na mayroon pala itong nakabinbin na warrant of arrest nitong Lunes, Hulyo 4, 2022.
Kinilala ni PMGen Felipe R Natividad, Regional Director ng National Capital Region  Police Office, ang suspek na si Roque Sumayo y Cayubit na ang tunay na pangalan ay Roque Sumayo y Cayobit, 53, ipinanganak noong Oktubre 7, 1968 sa Tacloban City, Leyte, balo, walang trabaho at kasalukuyang naninirahan sa No. 005 Jordan Street, Sitio Nazareth, Brgy. San Isidro, Parañaque City.
Ayon kay PMGen Natividad, naaresto ang akusado dakong 8:00 ng gabi malapit sa Camp Security and Escort Unit, Camp Crame, Quezon City ng mga operatiba ng Parañaque City Police Station.
Ayon pa kay PMGen Natividad, pumunta sa himpilan ng Complaint and Referral Monitoring Center ng Police Community Affairs and Development Group sa Camp Crame  si Sumayo upang humingi ng tulong kay Officer-In-Charge PLtGen Vicente D Danao, Jr. na bigyan siya ng Witness Protection Program (WPP) dahil sa pangyayaring ni-raid umano ang kanyang bahay ng mga pulis at pinagbibintangan siya sa kasong pagpatay gayunpama’y nagawa nyang takasan ang mga ito ngunit pinatay naman nila ang kanyang misis.
Nang magsagawa ng record check ang pulisya gamit ang e-warrant, kanilang nadiskubre na mayroon itong nakabinbin na Warrant of Arrest sa kasong Murder (Riding-in-Tandem).
Nang makumpirma ito, agad na inaresto ng mga operatiba mula sa Parañaque City Police Station si Sumayo at ngayo’y haharapin niya ang kanyang kaukulang kaso.
Ang pag-aresto sa suspek ay pinadali dahil sa pagkakaroon ng E-Warrant. Ani PMGen Natividad, “Dahil sa teknolohiya, ginawang mas madali at mas maaasahan ang pag-verify ng mga Warrant of Arrest para sa mga ahensyang nagpapatupad ng batas tulad namin. Sa pagkakaroon ng mga online na platform at iba pang makabagong teknolohiya sa pagpapatupad ng batas, nakapaghatid kami ng mas mabilis at mapagkakatiwalaang resulta.”
Source: PIO NCRPO
###
Panulat ni PSSg Remelin Gargantos
