Arestado ang isang lalaki matapos magpaputok ng baril sa gitna ng isang alitan ng pamilya sa Purok 3A, Barangay Sumbac, Kidapawan City dakong 12:20 ng madaling araw noong Hunyo 2, 2025.
Kinilala ang suspek na si alyas “Tacio”, 52 anyos, may asawa, isang negosyante at residente rin ng nabanggit na lugar.
Ayon Police Lieutenant Colonel Josemarie R Simangan, Chief of Police ng Kidapawan City Police Station, ang insidente ay nagsimula nang magkaroon ng mainitang pagtatalo ang anak at ang kinakasama nito.
Sa layuning maawat ang pagtatalo, lumabas ang suspek at sinubukang pakalmahin ang magka-live-in.
Gayunman, sa gitna ng tensyon ay naglabas umano ang suspek ng kanyang baril at nagpaputok ng isang beses.
Naaresto ang suspek at nakumpiska ang isang kalibre 9mm ARMSCOR pistol na may serial number RIA2704003 na may kasamang magazine na kargado ng 15 bala.
Patuloy na paiigtingin ng Kidapawan PNP ang kanilang kampanya laban sa mga paglabag kaugnay ng umiiral na resolusyon upang mapanatili ang kapayapaan at kaayusan sa lungsod.
