Southern Leyte – Arestado ng mga tauhan ng Malitbog Municipal Police Station ang isang lalaki matapos magpaputok ng baril sa Brgy. Juangon, Malitbog, Southern Leyte, hapon ng Hulyo 3, 2023.
Kinilala ni Police Lieutenant Noel Carbonilla, Officer-In-Charge ng Malitbog MPS, ang suspek na si Del, 33, lending collector at residente ng Brgy. Juangon, Malitbog, Southern Leyte.
Ayon kay PLt Carbonilla, bandang 4:00 ng hapon nang makatanggap sila ng report mula sa isang concerned citizen na may isang lalaking lasing na nagpaputok sa nasabing barangay.
Agad na pinuntahan ng mga kapulisan ang lugar at inabutan pa ang suspek na hawak na baril at agad siyang dinisarmahan ng mga otoridad.
Nakumpiska mula sa suspek ang isang unit ng Colt .45 Caliber pistol na may serial number 334165, apat na live ammunition, at narekober din ang tatlong basyo ng bala sa pinangyarihan ng insidente.
Bigo namang ipakita ng suspek ang mga kaukulang dokumento na patunay ng pagmamay-ari ng baril.
Nahaharap ang suspek sa kasong paglabag sa Republic Act 10591 or Comprehensive Firearms and Ammunition Regulation Act, Illegal Discharge of Firearms at Alarm and Scandal.
Pinaalalahanan naman ng kapulisan ang mamamayan na huwag magpaputok ng baril kahit may lisensya man sila o wala para maiwasan ang sinuman na maging biktima ng ilegal na gawaing ito.
