Bambang, Nueva Vizcaya (January 16, 2022) – Nahuli ang isang lalaki na sangkot sa pagbebenta ng pekeng vaccination card sa isinagawang entrapment operation ng mga tauhan ng Bambang Police Station sa Barangay Almaguer North, Bambang, Nueva Vizcaya, gabi ng Enero 16 taong kasalukuyan.
Kinilala ang suspek na si Perlito Cabanban, 49 anyos, may asawa, porter ng NVAT at residente ng Barangay Poblacion, Aritao, Nueva Vizcaya.
Ayon kay Provincial Director, Police Colonel Ranser Evasco, isinagawa ang operasyon matapos makatanggap ng impormasyon na nagbebenta si Cabanban ng pekeng COVID-19 vaccination card sa nabanggit na lugar.
Naganap ang nasabing operasyon dakong 7:30 ng gabi nang magpanggap ang isang pulis bilang isang poseur – buyer at nagawang makabili ng tatlong (3) pekeng vaccination card na nagkakahalaga ng Php3,000 bawat isa.
Narekober mula sa suspek ang isang (1) pekeng vaccination card na nakapangalan mismo sa kanya, isang (1) black/gray wallet na naglalaman ng kanyang pagkakakilanlan, dalawang (2) iPhone cellular phone, marked money na ginamit sa entrapment operation at Php500.
Mahaharap sa kasong paglabag sa Art. 172 of Revised Penal Code in relation to Rule XI Section 1 Paragraph B of Implementing Rules and Regulation of RA No. 11332 o alleged fake vaccination cards ang isasampa sa suspek.
Samantala, isang indibidwal naman ang nagsurrender ng pekeng vaccination card sa Municipal Health Office ng naturang bayan at saka nagboluntaryo na din siyang nagpabakuna.
Pinaalalahanan ni PD Evasco ang publiko na maiging magpabakuna na lamang sa lehitimong ahensya sapagkat libre naman ang serbisyong ito at para din sa proteksyon ng pangkalahatan.
###
Panulat ni Police Corporal Carla Mae P Canapi
Husay at galing tatak PNP