Palompon, Leyte – Arestado ng pulisya ang isang lalaki habang nag-aapply ng Police Clearance sa Palompon Municipal Police Station sa Brgy. Central 2, Palompon, Leyte noong Hunyo 28, 2022.
Kinilala ni Police Major Ronald D Espina, Officer-in-Charge, ang naaresto na si Jose Naul, 32, binata, pedicab driver, residente ng Brgy. Cantuhaon, Palompon, Leyte.
Ayon kay PMaj Espina, nag-aapply si Naul ng Police Clearance at lumabas sa records na mayroon siyang standing Warrant of Arrest sa kasong Frustrated Homicide na may piyansang Php60,000.
Ang National Police Clearance ay isang dokumento na nagsisilbing background check ng pulisya.
Pinuri naman ni Police Brigadier General Bernard M Banac, Regional Director, ang mabilis na pagkilos ng mga tauhan ng Palompon MPS.
“Sa aming National Police Clearance system, mas naging madali ang pagsubaybay sa mga wanted na personalidad sa buong bansa. Ito ay isang mahalagang tool sa kampanya laban sa karamihan ng mga wanted na tao,” ani PBGen Banac.
Binigyang-diin din ni PBGen Banac na dinodoble ng PRO 8 ang pagsisikap nitong arestuhin ang mga nagtatago sa batas.
###
Panulat ni Patrolwoman Rialyn B Valdez
