Bunga ng isang aksidente sa kalsada ay nakuhanan ng pulisya ang isang lalaki ng ilegal na droga at baril sa Barangay Hanglid, President Roxas, Capiz noong ika-18 ng Mayo 2024.
Kinilala ni Police Major Rachelle D Garnica, Chief of Police ng President Roxas Municipal Police Station, ang nabanggit na personalidad na isang 48 taong gulang na lalaki, naitalang Street Level Individual at residente ng nasabing bayan.
Ayon kay PMaj Garnica, habang nagmamaneho ang suspek mula sa Barangay Hanglid patungong bayan ng President Roxas, Capiz, nawalan siya ng kontrol sa kanyang motorsiklo at aksidenteng nadulas sa sementadong kalsada at dahil dito ay nawalan siya ng malay at nagtamo ng mga sugat sa iba’t ibang bahagi ng katawan.
Subalit sa pagresponde ng kapulisan ng Pres. Roxas PNP nakuha mula sa pag-aari at kontrol ng suspek ang isang yunit ng homemade Cal. 45 na baril na walang serial number, isang magasin, anim na piraso ng bala, tatlong sachet ng hinihinalang shabu na may tinatayang bigat na isang gramo, dalawang piraso ng lighter, isang pulang belt bag, isang yunit ng Vivo cellphone, at Php402.00 na cash.
Ang mga nakuhang ebidensya ay kasalukuyang nasa pag-iingat ng Pres. Roxas MPS para sa tamang disposisyon.
Samantala, ang suspek ay dinala sa Bailan District Hospital, Pontevedra, Capiz para sa tamang paggamot at pagkatapos ay dadalhin sa President Roxas MPS para sa tamang dokumentasyon.
Patuloy ang Pres. Roxas PNP sa kanilang dedikasyon sa pagpanatili ng katahimikan at kaayusan sa kanilang nasasakupan at hulihin ang mgat taong lumalabag sa batas.
Source: PCADG Western Visayas
Panulat ni Pat Charmaine Balunsat
