Camarines Norte – Arestado ang isang lalaki na kabilang sa Drug Related Data Integration and Generation System ng PNP sa isinagawang drug buy-bust operation ng Camarines Norte PNP sa Happy Homes Pasig, Purok 6, Barangay II, Daet, Camarines Norte nitong Martes, Enero 24, 2023.
Kinilala ni Police Lieutenant Colonel Arnel De Jesus, Chief of Police ng Daet Municipal Police Station, ang suspek na si alyas “Yael”, 54, walang trabaho at residente ng nabanggit na lugar.
Ayon kay PLtCol De Jesus, naaresto ang suspek ng pinagsanib na mga tauhan ng Daet MPS, Camarines Norte Provincial Intelligence Unit at Regional Intelligence Unit, Provincial Intelligence Team Camarines Norte.
Nakuha sa suspek ang isang maliit na pakete ng hinihinalang shabu, Php500 buy-bust money, isang pekeng Php500 boodle money at isang itim na wallet na naglalaman ng isang bukas na plastic na may nakapaloob na anim na maliit na pakete ng hinihinalang shabu at may kabuuang halaga na Php7,000.
Mahaharap ang suspek sa kasong paglabag sa Section 5 at 11, Article II ng RA 9165 o Comprehensive Dangerous Drugs Act of 2002.
Ang Pambansang Pulisya ay hindi tumitigil sa pagsagawa ng ganitong mga operasyon para mawakasan ang pagkalat ng ilegal na droga upang wala nang kabataan ang maging biktima nito.
Source: Camarines Norte PPO
