Prosperidad, Agusan del Sur – Patay ang isang lalaki matapos pagbabarilin ng dalawang hindi nakilalang suspek sa Agusan del Sur nito lamang Martes, Mayo 3, 2022.
Kinilala ni Police Colonel Jovito Canlapan, Acting Provincial Director ng Agusan del Sur Police Provincial Office, ang biktima na si Constancio Ibal Jr, 71, residente ng P-3, New Maog, Prosperidad, Agusan del Sur.
Ayon kay PCol Canlapan, bandang 10:50 ng gabi ng pagbabarilin ang biktima ng dalawang suspek habang minamaneho ang kanyang sasakyan sa Maharlika National Highway ng Purok 3, New Maog, Prosperidad, Agusan del Sur.
Agad namang isinugod ng Search and Rescue ang biktima sa pinakamalapit na ospital ngunit agad ding dineklarang dead-on-arrival mula sa natamong tama ng baril sa kanyang dibdib, likod at braso.
Samantala, narekober naman sa Crime Scene ang anim na basyo at tatlong slug na pinaniniwalaang bala ng .45 calibre pistol.
Ang PNP ay patuloy na magsasagawa ng imbestigasyon upang matukoy ang pagkakakilanlan ng dalawang suspek at mabigyang hustisya ang pagkamatay ng biktima.
###
Panulat ni Patrolman Jhunel Cadapan/RPCADU13
