Kalaboso ang isang lalaki matapos maaktuhang gumagamit ng ipinagbabawal na droga sa Barangay Kilicao, Daraga, Albay bandang 12:05 ng hapon nito lamang Hunyo 3, 2024.
Kinilala ang suspek na isang 28 taong gulang at residente ng Purok 4, Bañadero, Daraga, Albay.
Matagumpay na naaresto ng Daraga Municipal Police Station ang suspek batay sa ulat ng isang Barangay Tanod na romoronda sa lugar na may napansin ang kahina-hinalang kilos ng suspek sa madamong bahagi malapit sa may sapa ng nasabing barangay. Dito na agad inaresto ang suspek matapos makumpirma na nasa akto ito ng paggamit ng iligal na droga.
Nasamsam mula sa suspek ang isang heat sealed transparent plastic sachet ng hinihinalang shabu at mga drug paraphernalia.
Kasong paglabag sa Sec 11 at 12, Art. II ng RA 9165 o Comprehensive Dangerous Drugs Act of 2002 ang kakaharapin ng suspek.
Patuloy ang PNP sa pagsasagawa ng mga kampanya kontra ilegal na droga sa pakikipagtulungan ng komunidad para mawakasan ang masamang dulot nito sa lipunan tungo sa maayos na Bagong Pilipinas.
Source: Daraga Mps Albay Ppo
Panulat ni Pat Rodel Grecia
