Davao Oriental – Arestado ang isang lalaki matapos makuhanan ng ilegal na baril at patalim sa Mati Centennial Transport Terminal Complex (MCTTC), Davao Oriental, noong Oktubre 2, 2022.
Kinilala ni PLtCol Ernesto Gregore, Chief of Police ng Mati City Police Station, ang suspek na si alyas “Rodello”, 51, residente ng Upper Tagawisan, Barangay Badas, Mati City.
Ayon kay PLtCol Gregore, naaresto ang suspek matapos sitahin ng isang empleyado ng MCTTC ang suspek na pumasok sa maling bahagi ng nasabing terminal, subalit nagalit at naglabas ng baril ang suspek.
Dagdag pa ni PLtCol Gregore, nakuha mula sa suspek ang isang caliber 357 Magnum Revolver na may Serial No. 945524 at may kasamang apat na basyo ng bala at isang stainless na kutsilyo
Ang suspek ay nahaharap sa kasong paglabag sa Republic Act 10591 o Comprehensive Firearms and Ammunition Regulation Act at Batas Pambansa No. 6 o An Act Reducing the Penalty for Illegal Possession of Bladed, Pointed or Blunt Weapons at upang dumaan sa tamang disposisyon.
Nagbabala naman ang PNP na huwag magdala ng deadly weapon sa pampublikong lugar at magkaroon ng malasakit sa komunidad upang makamit ang kaayusan at kapayapaan tungo sa kaunlaran ng bansa.
Panulat ni Patrolman Alfred Vergara
