Arestado ang isang lalaki matapos mahulihan ng baril na walang kaukulang dokumento sa isinagawang Oplan Bulabog ng mga tauhan ng Caloocan City Police Station nito lamang Martes, Disyembre 26, 2023.
Kinilala ni Police Colonel Ruben Lacuesta, Chief of Police ng Caloocan CPS, ang suspek na si alyas “Anthony”, 29 taong gulang, binata, katulong, at residente ng Barangay 120, Caloocan City.
Ayon kay PCol Lacuesta, namataan ng kanyang mga operatiba ang suspek na may hawak ng nasabing baril na nakasukbit sa kanyang baywang dahilan upang tanungin sya sa kanyang lisensya at permit to carry.
Dito nabigo ang suspek na magpakita ng anumang mga dokumento na siyang nagtulak sa mga pulis na arestuhin siya at kumpiskahin ang nasabing baril bandang 1:40 ng madaling araw sa kahabaan ng Josefina. Street, 3rd Avenue, Grace Park, Barangay 120, Caloocan City.
Narekober sa suspek ang isang (1) Grand Master Caliber 9MM Pistol na may Serial No. 047016, isang (1) Magazine Assembly, at tatlong (3) piraso ng live ammunitions na inilaan para sa Caliber 9MM.
Nahaharap ang suspek sa kasong paglabag sa RA 10591 o Comprehensive Firearms and Ammunition Regulation Act.
Nanawagan naman ang Caloocan Pulis na isurender sa otoridad ang mga ilegal na armas upang hindi makapahamak ng mga inosenteng indibidwal at upang hindi magamit sa mga ilegal na aktibidad.
Source: NPD PIO
Panulat ni PSSg Remelin M Gargantos
