Sultan Kudarat — Himas rehas ang isang 24-anyos na lalaki matapos lumabag sa ipinatutupad na COMELEC gun ban sa Brgy. Malegdeg, Senator Ninoy Aquino, Sultan Kudarat nito lamang Sabado, Oktubre 21, 2023.
Ayon kay Police Captain Mingfie Santillana, Officer-In-Charge, Senator Ninoy Aquino Municipal Police Station, habang nagsagawa ng COMELEC Checkpoint ay kanilang nahuli ang suspek na si alyas “Rizaldo” na residente ng Brgy. Tinalon, Senator Ninoy Aquino, Sultan Kudarat dahil sa dala nitong isang homemade caliber 5.56 na may kasamang magazine at 20 bala.
Nabigo ang suspek na magpakita ng mga kaukulang dokumento dahilan upang arestuhin para sa kasong paglabag sa Comprehensive Firearms and Ammunition Regulation Act kaugnay sa COMELEC Gun Ban.
Patuloy ang panawagan ng PNP sa publiko na ganap na makipagtulungan sa ipinatutupad na election gun ban at iwasang magdala ng mga baril at anumang nakamamatay na armas dahil ang pulisya ay mananatiling nakatuon sa pagtiyak ng panuntunan ng batas para sa mas maayos at ligtas na Barangay at Sangguniang Kabataan Elections 2023.
Panulat ni Patrolman Khnerwin Jay A Medelin
