Capiz – Arestado ang isang 41 anyos na lalaki matapos makuhaan ng hindi lisensyadong baril sa ikinasang buy-bust operation ng Roxas City PNP sa Barangay Dinginan, Roxas City, Capiz nitong Ika-4 ng Setyembre 2023.
Kinilala ni Police Lieutenant Colonel Francisco Paguia, Officer-In-Charge ng Roxas City Police Station, ang suspek na si Wilmer Buenvenida y Amoyan, residente ng Brgy. Baybay, Roxas City.
Inaresto ng mga tauhan ng Roxas City Police Station ang suspek matapos itong mahulihan ng isang .22 caliber revolver na may tatlong bala.
Narekober din sa suspek ang Php2,000 na marked money, sling bag, at ang RUSI motorcycle na ginamit ng suspek.
Nahaharap ngayon ang suspek sa kasong paglabag sa RA 10591 at COMELEC Gun Ban.
Mahigpit na ipinapatupad ng ating kapulisan ang Nationwide Gun Ban kaugnay sa 2023 Barangay at Sangguniang Kabataan Elections (BSKE) upang masiguro ang kaligtasan at seguridad ng mamamayan sa papalapit na eleksyon.
