Lebak, Sultan Kudarat – Mabilis na nirespondehan ng Lebak PNP ang insidente ng pananaksak kung saan matagumpay na naaresto ang isang lalake sa Barangay Taguisa, Lebak, Sultan Kudarat noong Abril 21, 2022.
Kinilala ni PLtCol Julius Malcontento, Officer-in-Charge ng Lebak Municipal Police Station, ang suspek na si Richard Reymundo Fernandez, 28, residente ng Sitio Paga, Barangay Taguisa at ang biktima na si Joselito Samillano Sacdalan, 27, may asawa, magsasaka at residente ng Sitio Saban, Barangay Datu Karon ng naturang bayan.
Ayon sa imbestigasyon, nagtatalo umano ang suspek at ang asawa nito sa bahay ng kanyang biyenan nang awatin ng biktima na pinsan ng kanyang asawa. Dahil lasing ang suspek, sinaksak nito ang biktima ng kutsilyo na tumama sa kanyang tiyan.
Ayon kay PLtCol Malcontento, agad namang dinala sa Sultan Kudarat District Hospital ang nasabing biktima, habang ang suspek ay agad na nakatakas pagkatapos ng pangyayari.
Ayon pa kay PLtCol Malcontento, kalaunan ay boluntaryong sumuko ang suspek kay Brgy. Kagawad Albert Guasin ng Taguisa.
Ang suspek ay nakatakdang sampahan ng kasong Frustrated Homicide.
###
Panulat ni Patrolman Khnerwin Jay A Medelin
