McArthur Highway, Valenzuela City — Arestado ang isang lalaki matapos magpaputok ng baril sa Full House Bar sa Caloocan City ng mga otoridad nito lamang Sabado, Setyembre 17, 2022.
Kinilala ni Police Colonel Ponce Rogelio I Peñones, Acting District Director ng Northern Police District ang suspek na si Tomy Nikko O. Ong, 33, residente ng Gen T. De Leon, Valenzuela City.
Ayon kay PCol Peñones, bandang 1:15 ng madaling araw naaresto si Ong sa T. Santiago St., Barangay Malanday, McArthur Highway, Valenzuela City sa pinagsanib puwersa ng Valenzuela City Police Station, Special Reaction Unit at Dalandanan Police Sub-Station 6.
Ayon pa kay PCol Peñones, nangyari ang insidente matapos magalit ang suspek sa dati niyang nobya kung saan nagtatrabaho bilang isang dancer.
Biglang bumunot ng baril ang suspek mula sa kanyang baywang at nagpaputok pataas kasabay nang kanyang pagtakas.
Agad naman naireport ang pangyayari sa pulisya kung kaya’t nagsagawa ng dragnet operation ang PNP sa lugar na posibleng dadaanan ng suspek.
Narekober mula sa suspek ang isang (1) armscor caliber .45 pistol loaded ng isang live ammunition, isang empty magazine, isang magazine assembly na puno ng sampung (10) live ammunition, at isang red Peugeot sedan na sasakyan na may plate number na AAZ 5733.
Sasampahan si Ong ng mga kaukulang kasong paglabag sa RA 10591 o Comprehensive Firearms and Ammunition Regulation Act, paglabag sa RA 10586 o Anti-Drunk and Drugged Driving Act of 2013, at Alarms and Scandal at Grave Threats ng Revised Penal Code.
Pinuri ni PCol Penones ang mabilis na responde sa insidente, aniya, “Ang mabilis na pagtugon ng kapulisan ng NPD ay base sa random visibility patrol at alinsunod sa konsepto na pinatutupad na OPLAN SAFE NCRPO na nilunsad ni PBGen Jonnel C. Estomo, Acting Regional Director, na pawang epektibo at habang kayo ay natutulog, ang Pulis ay gising, nagbabantay at nakahandang tumugon sa anumang sitwasyon.”
SOURCE: NPD PIO
Panulat ni PSSg Remelin M Gargantos
