Davao de Oro – Nahukay ang labi ng isang hinihinalang biktima ng mga komunistang teroristang grupo na New People’s Army sa Sitio Bagtok, Brgy. San Vicente, Montevista, Davao de Oro, nito lamang Lunes, Abril 4, 2022.
Naging matagumpay ang paghuhukay sa mga buto sa pangunguna ni PLt Rodien Hormigas, Team Leader ng Revitalized Pulis sa Barangay Cluster 21 sa pamumuno ni PCol Leonard Luna Provincial Director, Davao de Oro Police Provincial Office.
Gayundin sa pakikipag-ugnayan at pakikipagtulungan na rin sa R-PSB Cluster 3 sa pamumuno ni PLt Ramil Anthony Maxey; tauhan ng Davao de Oro 1st PMFC sa pangunguna ni PLtCol Darwin Dura, Force Commander; 25th IB at opisyales ng Brgy. San Vicente.
Ayon kay PLt Hormigas, ang biktima ay hinihinalang napagkamalang intel ng sundalo dahilan upang ito ay patayin ng mga NPA na maaaring binaril sa ulo dahil sa nakitang butas sa bungo nito.
Kaagad na dinala ng R-PSB team ang mga nahukay na buto sa San Vicente Public Cemetery para mabigyan ng disenteng libing.
Dagdag pa ni PLt Hormigas, nadiskubre ang nasabing pinaglibingan sa tulong at testimonya ng isang dating kasapi ng rebeldeng grupo na nagbalik-loob sa gobyerno at mga residente ng nasabing lugar na sinasabing dating kampo ng NPA.
Ang pagkakahukay sa nasabing labi ay nagpapakita lamang ng aktibong kooperasyon at pakikipag-ugnayan ng komunidad sa PNP upang ilantad ang kalupitan ng komunistang teroristang grupo.
###
Panulat ni Patrolman Alfred D Vergara
