Cagayan – Naihatid na ng Cagayano Cops sa kanyang pamilya na nag-aantay sa Echague, Isabela nitong Lunes, ika-8 ng Mayo 2023 ang labi ng isa sa mga nasawi sa naganap na engkwentro sa Buguey, Cagayan.
Matatandaan na nagkaroon ng sagupaan noong Mayo 3, 2023 sa pagitan ng kasundaluhan at Communist Terrorist Group sa Villa Cielo, Buguey, Cagayan kung saan dalawa ang nasawi.
Sinalubong ang labi ni alyas “Lorna” ng kanyang pamilya sa D Carbonel, Brgy. Soyung, Echague, Isabela kung saan ito ay ipinacremate bago iuwi sa kanilang tahanan.
Nagpasalamat naman ang pamilya ng nasawi sa kapulisan at kasundaluhan sa maayos na paghatid sa kanila ng labi nito upang mabigyan ng isang maayos na libing.
Samantala, sa panayam ng Cagayan Police Provincial Office sa ama ni Lorna, naikwento nito na ang kanyang anak ay isang matalinong bata na nagtapos sa isang prestisyosong unibersidad at balak kumuha ng abogasya.
Nalaman na lang daw umano nilang nasa probinsya na si Lorna at marunong ng magsalita ng Ilokano at Ibanag.
Nag-iwan din ito ng payo sa mga kabataan at sinabing makinig sila sa kani-kanilang mga magulang.
Sa mensahe naman ni Police Colonel Julio Gorospe Jr., Provincial Director ng Cagayan Police Provincial Office, pinaalalahanan niya ang publiko na huwag magpapalinlang sa mga ideolohiya ng CTGs. Pinayuhan din niya ang mga magulang na bantayan ang kanilang mga anak at alamin ang aktibidad ng mga ito.
Source: Cagayan Police Provincial Office
