Si Patrolwoman Ma. Stephanie Dawn Credo Gadingan ay kilala hindi lamang sa kanyang pagseserbisyo sa bayan, kundi pati na rin sa kanyang natatanging talento sa larangan ng musika. Mula sa Siaton, Negros Oriental, siya ay isang dedikadong Assistant PCR PNCO ng Regional Mobile Force Company, PRO7 na may malalim na malasakit sa kanyang tungkulin at komunidad. Ngunit sa likod ng uniporme, umiiral ang kanyang pagmamahal sa musika.
Si Pat Gadingan ay lumaki sa isang pamilya kung saan musika ang naging tulay upang maipahayag niya ang kanyang damdamin. Lalo niyang pinagyaman ang kanyang talento, na unang hinubog ng kanyang ama, ang unang nagmulat sa kanya sa mundo ng musika. Mula sa maliliit na awitin sa tahanan hanggang sa mga pagtatanghal, hindi niya iniwan ang kanyang pangarap—na ngayo’y higit pang pinatatag ng mga taong patuloy na naniniwala at sumusuporta sa kanya.
Siya’y nakapagtapos ng kolehiyo bilang iskolar dahil sa kanyang pagiging choir member. Ang kanyang mga karanasan ang nagdala sa kanya sa entablado ng Tawag ng Tanghalan, isang prestihiyosong kompetisyon ng pagkanta, kung saan siya’y nagwagi bilang daily winner.
Higit pa sa kanyang mga tagumpay sa pagkanta, si Pat Gadingan ay isang ehemplo ng determinasyon at pagiging makatao. Sa bawat tungkulin bilang Assistant PCR PNCO, dala niya ang disiplina at sipag na natutunan niya sa musika at sa pagganap ng kanyang tungkulin bilang lingkod bayan.
Si Pat Ma. Stephanie Dawn Credo Gadingan—isang alagad ng batas, isang iskolar, isang mang-aawit, at isang huwaran na anak ang nagpapatunay na ang talento at dedikasyon kapag sinamahan ng pagsusumikap at suporta ng pamilya, ang siyang maghahatid sa atin sa tagumpay sa ano mang larangan.
