Cagayan – Umarangkada ang Kids Back to Health Project ng Valley Cops na isinagawa sa Malabbac Elementary School, Brgy. Malabbac, Iguig, Cagayan nitong Lunes, ika-19 ng Hunyo 2023.
Ayon kay Police Major Babyrose Cajulao ng Regional Community Affairs and Development Division 2 (RCADD 2), ang proyektong ito ay isasagawa sa loob ng labinlimang (15) araw kung saan magkakaroon sila ng feeding activity sa mga piling batang malnourish upang matulungan ang mga ito na maibalik ang kanilang masigla at malusog na pangangatawan.
Sa kabuuan, 40 na bata ang napiling maging benepisyaryo ng nasabing programa.
Naging posible ang proyekto sa pangunguna ng RCADD 2 at sa tulong ng Regional Finance Service Office 2 at Iguig Municipal Police Station.
Samantala, pasasalamat naman ang naging tugon ng mga guro, magulang, at mga benepisyaryo sa malasakit sa kanila ng Valley Cops.
Siniguro naman ng pamunuan ng PRO2 na patuloy silang maglulunsad ng mga proyekto na hindi lang nakasentro sa kapayapaan at kaayusan kundi pati sa kalusugan at pangkabuhayan ng mga mamamayan ng Lambak ng Cagayan.
Source: Police Regional Office 2
Panulat ni Police Staff Sergeant Mary Joy D Reyes
